本文重點
兩支季初表現未如理想球隊，紐約人同猶他爵士明天早上交鋒。紐約人堪稱爵士剋星，近五次主場對爵士全勝，趁爵士主將布沙唔在狀態，紐約人明日主場出擊又可大跳爵士舞！（有線165台周二早上8時30分直播）
布沙跌Watt 爵士冇運行
爵士大前鋒布沙季初大跳草裙舞，場上表現懶懶閒，今季投射命中率僅得41.9%，係加盟NBA以來最差一季，爵士龍頭大跌Watt，球隊演出亦一蹶不振，六仗僅得二勝四負，排西岸十二位。
雖然紐約人季初表現亦唔係好，贏過一場咁大把，但佢哋每次對爵士都特別神勇，除近五次主場全勝外，近九次交手盤路全勝，今次有主場之利，有力偷雞。
事實上，紐約人幾名主力近期手風唔錯，前鋒艾爾夏寧頓平均每場得19.9分，得分把握力頗強，最重要係球隊得分點分散，大衞李爾、拉利曉士及加連拿利平均得分都喺15分以上，只要比賽初段手風順，爵士唔係佢哋手腳。