好多女仔成日都想捉個男朋友去睇相，除咗睇吓佢將來會唔會發達之外，仲好想睇吓佢會唔會花心，但原來想知自己嘅另一半係咪花心鬼，唔使搵師傅，自己睇吓都可以知道，今日就教大家幾招啦！
撰文：小德
如果男人鼻頭同鼻樑上有痣，佢嘅性能力會比較強，特別係持久力，做佢哋嘅太太真係冇得頂，但如果妻子嘅食量未能配合，做丈夫嘅就會產生外騖之心，起初只會係逢場作戲，但由於天生異稟，會深得女性喜歡，所以花心嘅指數極高。
另外，要睇吓佢條眉，如果男人條眼眉毛生得幼細，而且好似女仔咁生得彎彎嘅，代表耳仔軟，欠缺主見，經常都會畀異性呃，佢哋對女性可以話完全冇辦法，明明發誓話唔再相信女人，但轉頭又會輕易上當，失身又失金。
第三種係眉毛前濃後淡，加上眉嘅周圍有痣，呢種男人嘅性格大情大性，而且疏財仗義，所以身邊損友多籮籮，加上欠缺節制能力，只要朋友叫到，佢就會義無反顧咁去滾，為免畀朋友笑，佢哋仲會表現異常投入，所以正是花心蘿蔔！
最後一種係眉毛短而生得雜亂，加上口邊有痣，呢種人情緒變幻莫測，喜歡隨心意行事，加上特別貪杯好色，所以嫖賭飲吹樣樣齊，就算家境富裕或者本身搵到錢，但到中年後都會敗光，但仍然不知收斂。