政情：大輝決絕退選廠商會
中華廠商聯合會（廠商會）新一屆會董選舉即將舉行，最近選票已寄出畀會員，但選票上廠商會立法會代表林大輝的名字就用筆劃去，引起該會內部議論紛紛。據悉在選票臨寄出前幾日，大輝臨時臨急通知秘書處退選，唔通大輝終於諗通咗，決意參加直選，放棄以功能界別途徑問鼎下屆立法會？不過，就算唔代表廠商會參選立法會，大輝都唔使突然揮別廠商會，究竟因咩事咁決絕？
獲元老讚勇敢
據知情人士透露，上月初廠商會拉隊訪京，獲某位國家領導人高調接見。據聞喺閉門會面期間，廠商會某位德高望重的元老發言時，初初原本都係好廣泛咁講吓客套說話，點知突然話鋒一轉，點名盛讚大輝多年來擔任廠商會立法會代表，功勞唔小，但大輝將嘗試參加直選，仲讚大輝好勇敢添。據聞在場的大輝臉色一沉，在座會董們亦嚇咗一跳，事關大輝一直未表態係留低抑或出走，元老咁講無異於將大輝一軍，令佢心灰意冷。
自從前年底不顧廠商會立場，在立法會支持對特首提出的不信任動議之後，大輝同廠商會的關係即出現微妙變化，亦有個別廠商會中人覬覦大輝個立法會議席。不過，大輝一直唔肯公開表態，就算自由黨黨魁田北俊早前公開向大輝「提親」，揚言願意讓出黨魁之位同佢現時立法會新界東議席，以吸引大輝入黨，但係大輝仍然不為所動。
話畀其他人試
我哋問過大輝做乜唔選會董，佢就直認唔想選，事關佢由陳永棋做廠商會會長時就做會董至今，係時候退落來畀其他人試吓喎！不過話時話，佔領行動已經持續逾二十日，政府同佔領者若未能傾掂數，政改爭拗勢必持續下去，到時政改獲立法會通過的機會微乎其微。大輝曾經揚言政改一旦被否決，將唔會再參選立法會，咁佢留唔留低在廠商會，又有乜所謂呢？