占士怨最後一擊不獲罰球

其實騎士近況唔差，面對公牛前攞到今季首個三連勝，而新兵奧尼爾亦對巫師時打出代表作，狀態愈嚟愈好。可惜騎士今場喺第二節嚴重失準，完半場前更被公牛打出一段8比0攻勢，反先3分。騎士第三節藉主場氣勢追回不少分數，去到最後時刻更只落後一分，不過勒邦占士被兩人夾擊下剷籃失手，最終騎士就以一分飲恨。

今場公牛贏在表現平均，隊中有五位球員得分數字都過雙位數，包括鄧格嘅15分及戴歷羅斯14分。騎士方面，占士獲得全場最高25分，另外亦貢獻7個籃板球及6個助攻，至於奧尼爾就拿下14分及10個籃板球。對於今場敗仗，占士就非常唔忿氣，佢賽後話最後一擊上籃時，鄧格及諾亞都有碰撞佢，根本應該獲得兩記罰球機會，可惜球證竟然冇吹罰。騎士輸埋呢場後，總成績只係3勝3負，同預期目標出入頗大。

■本報綜合報道