明早西岸爆發大戰，湖人今季首度作客火箭。火箭季初缺少兩大巨星麥基迪同姚明，但喺將士用命下反而打出團體精神，尋日擊敗爵士一役，就有八名球員得分達雙位數，湖人靠高比仔單天保至尊惡唔出樣，今場火箭勝算更高。 （廣東體育台周四早上9時30分直播）

好多人以為火箭係靠姚明同麥基迪兩大天王巨星，但事實證明，火箭冇咗兩人往往表現更佳，好似尋日對爵士咁，教練阿杜文除大玩「車輪戰」外，其「小球戰術」更令對手大吃苦頭，依家隊火箭，甚有當年佢執教全盛時期嘅帝王影子。

其實火箭以往重用麥基迪同姚明，經常將進攻集中喺兩人身上，令對手易於防範，依家打整體戰效果更佳，上仗全隊合共有二十九次助攻，三分球十九投十中，淨係傳波同三分兩招已經玩謝爵士，依家火箭三連勝士氣大振，乘勝追擊對湖人，有力再下一城。

湖人仍缺加素

湖人季初雖然取得兩勝一負成績，但三仗都係主場賽事，表現只係平平，尤其係慘敗畀小牛一仗更係大出洋相，雖然有消息指西班牙中鋒加素會隨隊，但《洛杉磯時報》指加素傷勢唔樂觀，復出機會唔大，高比拜仁冇咗呢位最佳拍檔，新加盟嘅阿堤斯又交唔到功課，今場未必係火箭對手。