西甲班霸皇家馬德里今年再搞「巨星政策」，「閃電俠」保特呢期係大紅人，皇馬就想打鐵趁熱借佢宣傳，邀請保特到巴拿貝球場睇皇馬對拉科魯尼亞嘅西甲開鑼戰，到時保特、C朗、卡卡等同場，實行谷爆收視率。
最鍾意雲尼斯達萊
保特本身係足球迷，今年五月曾到曼聯訓練基地探訪，當時已同C朗見過面，保特仲話可以教C朗點樣跑快啲，而今次到巴拿貝球場再會C朗，保特就會換個角色，「扮新仔」跟隨皇馬大軍操練。
保特份人好客氣，話皇馬係佢最喜歡嘅球會，任何球隊都無法相比：「魯爾、雲尼斯達萊係足球史上最出色嘅兩位射手，雲尼斯達萊効力曼聯嗰陣，我已經鍾意佢。」保特一臉嚴肅咁話：「我好認真㗎，亦好期待畀我跟皇馬操練。」