高比拜仁奪得第四枚總冠軍指環後，大家開始關注佢嘅續約問題，由於高比仔可以選擇提前終止合約，再同湖人簽新約，預計佢喺二○一三至二○一四年所嘅人工達到三千三百廿七萬美元（約二億五千八百萬港元），高過「波神」米高佐敦最後一季為公牛効力嘅年薪，成為NBA史上最高薪球員。

第五年人工高過佐敦

根據《洛杉磯時報》報道，湖人勇奪總冠軍，令到高比差不多已決定留隊。據報雙方會簽一份六年新合約，新合約年薪將會係本賽季嘅105%，其後每年增幅10.5%。去到合約第五年，即二○一三至二○一四年球季，就會有三千三百廿七萬美元（約二億五千八百萬港元）年薪，比米高佐敦嘅三千三百一十萬美元（約二億五千六百萬港元）高少少，單季人工超越「波神」！

另外，湖人歷史性第十五次封王後舉行勝利巡遊，就幾乎因為資金不足搞到一鑊粥，原本資金要二百萬美元，仲講好湖人同洛杉磯政府一人一半，但因為經濟差遭到唔少市民反對，甚至要求取消巡遊，好彩最後一刻得到包括當地電影業商人卡斯韋沙文，同史特普斯中心嘅擁有機構等拍心口包埋另一半，先可以成事。