大帝三雙騎士2:3追魔

「一場都不能輸」嘅騎士,尋日重返主場應付東岸決賽第五回合,「大帝」勒邦占士繼續成為救世主,尾段關鍵時刻屢次單挑比杜斯得手,最終取得「三雙」,助騎士以112比102贏魔術,總成績追貼至二比三,明早兩軍將在奧蘭多打第六戰。(有線165台周日早上8時30分直播)

莫威廉士終於醒番

一如過往,騎士繼續頭威頭勢,首節已領先35比18,拉開十七分距離,但往後就陸續被魔術追分,上半場結束後,魔術已追貼至55比56,僅以一分落後。魔術第三節持續強勢,一度反先對手,幸好騎士一改末節啞火嘅毛病,占士挺身而出末節攻入十七分,其中負責盯占士嘅比杜斯更多番失守,畀「大帝」一打一恰死,最終騎士憑末節發威贏112比102。

返到主場比賽,「大帝」果然打出身價,佢今場個人攻入37分、14個籃板球及12次助攻,職業生涯第廿八次造出「三雙」。占士賽後話:「對我哋嚟講今場係生死大戰,一係贏波、一係就返歸,所以我哋有堅定嘅決心!」

除「大帝」之外,莫威廉士亦係騎士今場嘅關鍵人物,佢攻入24分,其中射入6個三分球,一改今個系列賽失準嘅情況。至於魔術,打得最好係陶告魯,佢攻入29分,而中鋒杜域侯活則貢獻24分及10個籃板球,不過就再次六犯離場。