魔術東岸決戰騎士

衞冕總冠軍的波士頓塞爾特人被奧蘭多魔術變走！魔術的杜域侯活失準，好彩有靚綠葉陶告魯大爆發，個人貢獻廿五分及十二個助攻，助魔術以一○一比八十二贏波，總場數四比三淘汰「綠軍」，進身東岸決賽，將惡鬥騎士爭奪冠軍及總決賽權。塞爾特人由上季總冠軍到今季連東岸決賽都入唔到，最大原因當然是「三巨頭」之首的加納特因傷缺陣，而球隊平均年齡較大及欠缺飢渴感，都是致命原因。

「綠軍」同魔術鬥到第七回合，但比賽過程並非想像中激烈，雖然塞爾特人有主場之利，但魔術由頭帶到尾，比賽最後五分鐘已進入垃圾時間。其實塞爾特人在常規賽季尾已開始跌Watt，出局可以話有先兆，蓋棺定論，有以下三大原因：

魔術東岸決賽決戰騎士，杜域侯活要向「大帝」勒邦占士宣戰。（美聯社圖片）	塞爾特人三巨頭之一嘅皮雅斯，輸到叉晒腰！（美聯社圖片）	塞爾特人節節敗退，冷板球員睇到冇晒心機。（美聯社圖片）
陶告魯及時而出，成為魔術擊殺塞爾特人最大功臣。（美聯社圖片）

（1）加納特受傷缺陣

塞爾特人引以為傲的「三巨頭」，雷阿倫及皮雅斯主要負責外圍進攻，加納特則坐鎮內線，不過，加納特自三月受傷後，鐵三角「崩」咗一隻角，影響極大，因為加納特不止是球隊攻守泉源，更加是塞爾特人精神領袖，欠缺他壓場，塞爾特人只不過是一支普通球隊。

（2）年紀大體力遜

經過一整季的拚搏，去到季後賽，塞爾特人首圈對公牛要打七個回合，其中多場要打到加時，體力已經受損，到東岸四強對魔術，一樣要打到第七個回合，皮雅斯輸波後坦言，自己攰到想死，好似油燈冇晒油一樣。塞爾特人幾名正選都好有經驗，但相對年紀較大，體力稍遜，在ＮＢＡ這個極體力化的運動，這點非常輸蝕。

（3）球員欠飢渴感

一般而言，球隊衞冕有一定難度，因為球員欠缺對冠軍的飢渴感，「綠軍」陣中球員，大部分是上季總冠軍功臣，他們上季搏到盡成為冠軍，今季遇到的對手，飢渴感肯定比塞爾特人大，公牛自佐敦王朝後，多年未染指任何冠軍，而魔術球會史上更是一個冠軍都未攞過，所以打得比塞爾特人更狠更搏命。