本文重點
【本報綜合報道】最近因為「疑似」女友被聯邦密探拘捕，搞到頭都痕埋嘅達拉斯小牛主將魯域斯基，放下兒女私情喺球場上大爆發，於主場對丹佛金塊嘅西岸四強賽，貢獻44分及13個籃板球，帶領球隊以119比117險勝對手，總場數追至1比3，為球隊吊住鹽水。不過，明朝輪到金塊主場，相信小牛難逃一劫。
小牛119:117金塊
「德國槍」魯域斯基「疑似」女友泰萊原來係「千面女飛賊」，仲要係警方通緝咗好耐嘅重犯，日前喺魯域斯基屋企落網，搞到魯域斯基無晒癮，影響之前三場對金塊嘅陣上表現。不過，魯域斯基始終係老江湖，男人嘅嘢梗係以事業為重，所以佢於第四回合大爆發，射入44分，比金塊主將安東尼嘅41分仲要多3分，亦因為佢帶動小牛其他球員表現，終於喺主場贏番場。
賽後魯域斯基好激動：「今晚實在好不可思議，我哋全場都落後，但能夠最後反勝當然高興，嚟緊我哋會繼續贏波創造奇迹。」不過，要喺丹佛主場贏波似乎有啲難度，因為今年季後賽，金塊喺主場五戰全勝，要作客贏佢哋似乎有啲難度。