高比波衫銷量勝「龍袍」

根據ＮＢＡ資料顯示，高比仔繼○六至○七年球季後，今季再次成為最暢銷球衣球星，而排第二就係勒邦占士，第三係「蜂王」基斯保羅。至於上季「賣衫王」加納特就跌落第四，人氣大不如前。此外，除高比仔高踞榜首之外，湖人戰衣亦成為今季最賣得嘅波衫。

蘭迪布朗破產賣指環

波衫大賣，高比仔肯定收入豐厚，睇怕佢都唔會攞啲冠軍指環出嚟拍賣填數啩，不過蘭迪布朗就要咁做啦。呢位曾經係米高佐敦隊友嘅前公牛後衞，早前短暫做過帝王助教，但其後被炒後，佢亦因欠債宣布破產，基於法官判佢所有財產都要攞出嚟拍賣，亦代表佢喺公牛王朝攞得嘅三隻冠軍指環都要被拍賣。

三隻冠軍指環將於美國時間五月十九日拍賣，每隻起價為一萬九千美元（約十四萬七千港元），拍賣行預計可以bid到至少七萬五千美元（約五十八萬港元）一隻，因為好多籃球發燒友都想擁有。