本文重點
衞冕總冠軍「綠衫軍」塞爾特人，遭逢沉痛打擊，教練李華士向傳媒公布，領袖加納特將因傷缺席今季季後賽，並大有機會喺休賽期間進行右膝手術，意味「綠衫軍」衞冕之路將相當難行！不過首圈對手公牛就唔多相信，並認為今次只係李華士故意「放流料」，所以唔會改變備戰方針，直情當冇聽過呢個消息！
據《波士頓郵報》報道，李華士指加納特（KG）會因右膝傷患問題，缺席季後賽賽事，而KG更會喺休戰期間動手術，移除膝蓋內嘅骨刺。據悉骨刺並非KG缺席季後賽主因，其實佢係因為肌腱拉傷，需要提早休息。
塞爾特人fans扯白旗
消息一出，大部分塞爾特人球迷都話球隊已衞冕無望。的而且確，KG除咗攻守兼備，最致命係佢乃「綠衫軍」精神領袖，冇咗佢根本難同騎士、湖人等強隊匹敵。此外，塞爾特人嘅不利消息接踵而至，GM安治因心臟病發送院，慶幸情況並唔嚴重，但要留院觀察。
不過，公牛唔多相信KG收咧嘅消息，主帥迪尼高認為季後賽經常都有假消息發放擾亂對手。而「狀元爺」戴歷羅斯就話，佢估計KG到其時會突然間話身體好轉，可以及時復出，所以公牛唔會輕信謠言。兩軍今晚凌晨就會進行首場賽事。（周日凌晨零時30分開賽）
因傷提早收咧球星
真路比利（馬刺）
尼爾遜（魔術）
麥基迪（火箭）
艾佛遜（活塞）
布蘭特（76人）
加納特（塞爾特人）