本文重點
「大帝」登基之路正式展開！NBA季後賽將於明日凌晨開打，首度帶領騎士登上常規賽冠軍寶座嘅「大帝」勒邦占士，強勢展開季後賽旅程，騎士東岸八強首圈遇上褪色班霸活塞，「大帝」前季已於東岸決賽領軍淘汰「壞孩子幫」，而今季常規賽對壘，騎士亦贏三比一，無復當年勇嘅活塞，實在難阻「大帝」闖關！（香港時間周日凌晨3時開賽）
今季已經係騎士連續四季打入季後賽，近年騎士喺季後賽經常遇上活塞，戰情仲非常激烈！○六年東岸四強，「活塞五子」絕地反擊，落後二比三下反勝四比三出線，令占士輸得五體投地，但翌年東岸決賽，就輪到騎士大逆轉，輸頭兩場之後連贏四仗，首次進身ＮＢＡ總決賽。
事隔兩季，兩軍已有頗大轉變，騎士得到莫威廉士襄助後，減輕咗「大帝」唔少壓力，除咗得分之外，莫威廉士仲有能力喺關鍵時刻取分，成為騎士另一致命武器。相反活塞主力已步入黃昏，尤其拉舒華萊士及咸美頓今季都飽受傷患困擾，而季初被寄予厚望嘅「AI」艾佛遜，亦因背傷提早收咧，活塞今季已成強弩之末，如今難與騎士相提並論。
再者，今季騎士主場威力大超班，卅九勝二負，試問活塞又邊有資格威脅騎士呢？
傳華商黃健華收購騎士
另外，昨晚傳出騎士可能被中國商人黃健華收購，消息指在美國生活了廿年的黃健華，在港註冊成立一家叫騎士聯盟的公司，並試圖收購該隊甚大數量的股份，目的要做大股東，但事情還有待ＮＢＡ各隊老闆的決議。
至於今季首場西岸季後賽，就係「三哥」馬刺對第六嘅小牛，馬刺常規賽尾段遭受沉重打擊，就係真路比利因傷提早收咧，呢位阿根廷人除咗係球隊得分主力，仲係穩定軍心嘅經驗老將，缺陣影響深遠。（有線體育台62及165台周日早上８時直播）