我叫Chris，雖然今次嚟到巴塞隆拿覺得好開心，但係我最鍾意都係曼聯，偶像更只得一個，就係C朗拿度，我着七號波衫都係因為佢咋。教練話我左腳好犀利，又擅長扭波，所以安排我踢左翼或左閘，其實我都好似C朗咁，可以打其他位置㗎。
我真係好鍾意C朗㗎，仲有儲佢啲球星卡，波衫都有買，不過就冇印字。我自己因為有近視，除咗踢波之外，平日都會戴眼鏡。會唔會影響踢波？梗係唔會啦，我睇過一啲雜誌報道，C朗本身都有戴眼鏡，只係落場踢波嗰陣換咗隱形眼鏡之嘛。等我遲下大個啲，我都會學似佢咁，戴隱形眼鏡去比賽。
曼聯啱啱喺歐聯同波圖二比二打和，好唔開心呀，不過見到朗尼後腳畀個波泰維斯射入，就真係好勁，仲喺酒店度嗌咗出嚟添。雖然有人話英格蘭球隊作客波圖好少贏波，不過呢個世界有奇迹吖嘛！
潘柏安 9歲 香港嘉諾撒學校 左翼／左閘