本文重點
NBA西岸賽事，狀態大勇嘅金塊繼續保持主場強勢，尋日以一二○比一○四輕取快艇，攞到近十二場第十一場勝仗，西岸「二哥」之位愈見穩固！今場金塊續有三分射手JR史密夫着火，全場射入七個三分波，攞到卅四分，難怪隊友安東尼賽後都話用滅火器都整唔熄佢把火。
JR史密夫3分王上身
為咗打破球隊史上最佳成績五十四勝二十八負，金塊可謂將士用命，全場lead住快艇嚟打，其中投射命中率及三分命中率都過半之下，金塊輕鬆以十六分大勝對手。繼上場用三分波射死爵士後，JR史密夫今場繼續着火，三分球十四射七中，全場攻入卅四分，係贏波頭號功臣！呢位仁兄近兩場合共投入咗十五個三分波，達到巔峰狀態，隊友安東尼賽後就搞爛gag：「佢成個人都着晒火，我試過用滅火器幫佢熄火，但根本冇用囉！」
餘下對手多魚腩
贏波後嘅金塊成績為五十一勝廿六負，領先第三嘅馬刺一場，因金塊其後五場賽事中，有三場對手都係超弱旅，包括木狼、雷霆及帝王，相信西岸二哥之位已非常穩陣。