魔術連捷追貼2:3
NBA史上從未有球隊在季後賽落後0比3下反勝出線，但魔術絕地反擊連捷！魔術尋日返主場出戰第五回合，「三分雨」戰術終於奏效，以113比92大勝塞爾特人，總成績追貼至2比3。塞軍是役有中鋒柏堅斯兩食技犯提早離場，連累下場亦要停賽，而「Big Baby」格連戴維斯則被「魔獸」撞至腦震盪，下場亦上陣成疑，大大增強魔術贏波本錢。
魔術今場能夠大勝，多少要感謝球證嘅嚴厲風格，塞軍中鋒柏堅斯在第二節完結前向球證抱怨而被罰第二個技術犯規，結果要提早離場，對塞軍內線造成極大影響。最慘係兩名內線替補格連戴維斯及拉舒華萊士，先後勇戰受傷退場，「Big Baby」戴維斯在一次防守時被杜域侯活打中頭部而腦震盪，出現神志不清狀況，而拉舒華萊士就觸傷背部，導致尾段無人可用，被魔術嘅劉易斯連番得分拉開比分。
格連戴維斯撞到腦震盪
此外，魔術今場亦回復「三分雨」殺着，全場25投中13球，係今個系列賽入最多三分球嘅一場，其中尼爾遜就５射４中，並獲得全場最高24分，佢賽後表示真正嘅魔術終於回歸。
塞爾特人教練李華士，賽後對球證執法大為不滿：「我認為柏堅斯兩個技犯都唔應該判，不過我唔會用此作為輸波藉口，相信賽會翻睇片段後，會撤銷柏堅斯嘅技犯，下場毋須停賽。」而格連戴維斯嘅情況就頗令李華士擔心：「佢被撞後一直出現神志錯亂狀況，相信要經過詳細檢查，先知道能否喺下場上陣。」兩軍將在周六早上進行第六回合比賽。
■本報綜合報道