政情：姍姍來遲 中大設支援基金 段崇智捐出人工
疫情持續多時，好多人早已陷入水深火熱嘅困境。中文大學校長段崇智，則等到本地疫情有所緩和，先至宣告中文大學成立支援基金，為受到疫情影響嘅大學成員渡過難關。而佢自己亦會倣效早前多位大學校長捐出薪水嘅做法，聯同全體七位副校長，捐出本年餘下每月一成五嘅薪金，作為起動基金。雖然支援基金成立得比較遲，但有關籌募、申請及發放嘅詳情要待稍後公布咁話。
三方面援助學生員工校友
今次中大成立嘅支援基金，主要援助包括三方面，第一，為家庭經濟受疫情影響嘅中大全日制本科生，提供附津貼嘅校內兼職工作，以紓緩財政壓力。第二，喺當前全球經濟衰退、失業率上升及職位空缺大減嘅情況下，為今年畢業嘅同學及去年畢業嘅校友，提供短期受薪在校工作機會，協助同學及校友累積實際工作經驗，增加競爭力。第三，為全職中大基層員工提供免息分期償還貸款，幫助佢哋紓緩家庭經濟困難。