政情:與病毒「百年戰爭」 沈祖堯提醒團結抗疫

好多人都期望疫情早日完結,但中文大學前校長沈祖堯,就指今次疫症係人類與微生物界一場數百年嘅戰爭,當人類嘅防疫工作做好啲,細菌、病毒又再叻一啲,侵入性高啲。佢呼籲各界團結及持續謹慎抗疫。

沈祖堯接受一個電台訪問,談及過去一段時間嘅社會問題同防疫抗疫嘅睇法,佢話香港需要向前走!儘管港人都經歷過困難嘅一年,不過社會團結好重要,若太多爭拗、互相推卸,不利本港應對同控制疫情。所以佢希望各方收拾心情,營造和諧氣氛,放下成見。佢又寄語年輕人唔好有悲觀情緒,亦唔好認為努力讀書考試係冇用,畢竟前面仍有好多路要走,亦有好多機會,社會並唔絕望,又指黑暗日子一定會完結,希望年輕人努力做好自己。

盼醫科生謹記終生使命

抗疫多月,沈祖堯認為醫護警覺性高,亦從沙士一役嘅痛苦經驗中學習,佢提醒大家唔好自滿,並為本港醫護人員感到驕傲。佢透露有醫生為減少病房人流,自行為病人抽血同送飯。醫護人員即使站在第一線,亦冇抱着「世界末日」嘅心態上場,希望本港醫科生同護士學生,都謹記自己選擇嘅終生使命。

第一手消息請下載on.cc東網iPhone/iPad/Android/Windows Phone Apps