政情：政府錯過封關時機 王冬勝籲放眼將來
香港已經咗三個幾月新冠肺炎疫情，經濟因而大受打擊，本地生產總值（GDP）首季修訂數字按年實質大幅收縮百分之八點九。當選為香港總商會新任主席嘅王冬勝，尋日喺總商會周年會員大會完結後被問到覺唔覺政府錯過咗疫情初期嘅封關時機，增加咗佢為會員營造良好營商環境嘅難度，但佢就好睇得開，話「事情已經過去咗，要放眼將來」喎。
市民等救命錢等到頸都長
王冬勝就話睇得開啫，但一班仲處於失業、放無薪假嘅小市民仍置身於疫情帶嚟嘅負面影響漩渦之中，廣大市民又點會覺得事情已經過去呢？講到「放眼將來」，水深火熱嘅小市民面對經濟困境都期望早日攞到政府派發嘅一萬元「救命錢」，但政府就話要七月先開始分批派錢畀市民，距離依家真係等到頸都長，認真係「放眼將來」，但能否見證將來就唔知喇！