政情:郵差派罩被狗咬 佛系朱曼鈴:非常關心

郵務派遞向來絕不輕鬆,工作量大之餘,又不時遇到風險。譬如前日有郵差到旺角上門派送銅芯抗疫口罩時,遭住戶飼養嘅唐狗突然鑽出大門噬咬,須送院診治。香港郵政對事件除表示「非常關心」,同呼籲狗主應綁好狗隻之外,就再無下文。議員何啟明認為香港郵政可透過人手調配,以減低郵差畀狗咬嘅風險,不過按署長朱曼鈴一貫嘅「佛系」表現,前線郵差要唔想畀狗咬,只有靠自己小心提防。

早遭詬病指處事因循

何啟明話郵差雖然冇可能穿着護甲去開工,不過香港郵政可以安排本身都係狗主,或同狗隻有接觸經驗嘅郵差,負責狗隻較多出沒嘅地點如鄉郊地區嘅派遞工作。呢種工作安排雖然唔算複雜,但何啟明相信香港郵政未必會去做,因為現任郵政署長朱曼鈴,過去作為旅遊事務專員嘅時候,何就同佢多次交手,感覺佢處事較為因循,亦唔會緊張前線同事嘅處境,就算今日身處郵政嘅崗位,恐怕都唔會有大太嘅改變咁話。

第一手消息請下載on.cc東網iPhone/iPad/Android/Windows Phone Apps