政情：疫境啟航 前路茫茫 水上的士收費定位惹質疑

運輸署署長陳美寶尋日喺立法會交通事務委員會上話，水上的士目標客戶以遊客為主，但議員譚文豪就覺得定位唔係咁啱，認為政府要一併考慮港人實際需要，唔應該淨係為遊客而設。譚又提到水上的士分段收費係十元至廿四元不等，計番條數，將廿四元乘四程嘅話，都只係九十六元，無理由全程收費會係一百三十六元，價錢唔合理，批評當局無好好解釋清楚。

啟德跑道公園碼頭偏僻

譚又話，水上的士其中一個上落客點係毗鄰啟德郵輪碼頭嘅啟德跑道公園碼頭，而水上的士載客量大約有百幾人，但啟德跑道公園碼頭上落客點嘅容量小，容納唔到咁多人，而且位置比較偏僻，乘客落船後點樣去到東九龍市中心都唔容易，希望政府正視點樣接駁乘客問題。

旅遊界議員姚思榮話，雖然依家有維港觀光船，但就無固定航班路線，考慮到市場需要，所以決定推出水上的士，政府最初構思係希望將五個碼頭串連起來，當遊客乘搭水上的士就可以欣賞到維港兩岸景色，對整體旅遊形象有好處。姚又話，雖然服務推出初期，每日只得三班船，但相信營運一段時間後，可以因應乘搭人數而加開班次。

議員倡先做好本地市場

姚又話，港人一向都鍾意新鮮感，估計水上的士可能喺本地市場只得一、兩年貨仔，往後生意都要靠遊客口碑，而水上的士有固定路線同收費，所以佢都同意應該改名叫做「水上綠Van」，但因為啲標誌都印好晒，睇怕都幾難改名喎。

不過，大家講咁耐，都未講到疫情持續嘅影響，萬一疫情持續到年底，遊客無法來港點算呢？姚思榮估計有關計劃都有可能會延遲，但唔係代表政府翹埋手唔使做，佢建議當局先集中做好本地市場，同時考慮吸納在港工作嘅外國人客源，畀佢哋喺船上舉行會議或派對。