中環出更：田北辰：銅芯口罩唔貼面 薛永恒寸爆話戴得唔好
今年初開始爆發新冠肺炎疫情，市面上一罩難求，人人都為口罩而煩惱。最近疫情開始有緩和迹象時，政府先向市民派發可重用嘅「銅芯抗疫口罩」，但可惜劣評如潮，唔少議員喺立法會上連番狙擊創新及科技局，包括款式同埋防疫功能。上任冇耐嘅創科局局長薛永恒尋日就喺會上話因為疫情擴散所以冇時間設計其他款式，又話有文獻指銅可以殺死病毒同埋細菌。
先有議員郭家麒質疑口罩嘅抗疫功效，然後醫學界議員陳沛然同議員鄭松泰質疑若有市民同確診者住同一大廈，市民應該點樣消毒口罩，才能避免受感染。議員田北辰就戴埋政府派發嘅銅芯口罩，即場示範個口罩不貼面，話除非唔戴眼鏡同唔呼吸，否則戴咗口罩後，眼鏡會出現霧化兼睇唔到嘢，仲建議政府應該關注埋濾芯嘅設計，配合外界設計口罩套喎。
稱符合人體工學
薛永恒回應時，唔單止話冇時間設計款式，仲話基於環保考慮，認為派發一次性嘅口罩唔適合；同時佢仲寸爆田北辰戴口罩戴得唔好，話口罩係用人體工學，如果田戴緊嗰個口罩太鬆，建議佢可以喺條繩度紮一紮就可以更貼面。
卓妮