政情：黃梓謙「食自己」整蛋糕慶生

Gary尋日喺Facebook上載咗自己整蛋糕嘅相，話有朋友講明唔買蛋糕，建議佢整番個，所以尋日佢就一早出去挑戰吓喇。聖誕節撞正公眾假期，佢都預訂到整蛋糕嘅興趣班，認真犀利。相中嘅Gary唔止捧住製成品，仲上載咗整蛋糕嘅過程，而個製成品亦都似模似樣喎。

盧偉國整私房菜宴好友

同樣喺聖誕節生日嘅仲有立法會工程界議員盧偉國（WK），佢尋日就出動「盧家私房菜」，仲有三十幾四十位朋友同佢慶祝添！而呢次私房菜仲係多國菜式，包括有英式嘅威靈頓牛柳、中式嘅燒味、日式嘅關東煮添等等。WK仲話自己喺聖誕節生日嘅好處，就係喺佢搞生日會嘅同時，啲朋友都可以有假放，大家都可以有個好藉口一齊飲飲食食喎。