政情：柯仔落區兼拍拖 街坊催快啲生B
唔少人都趁聖誕佳節去玩，就算唔去外遊，都會放低工作同家人慶祝。但立法會議員柯創盛（柯仔）喺尋日聖誕節正日，就選擇落區同一班獨居長者過，仲要帶埋太太行孖咇，實行落區當拍拖，咁無情趣？
柯太現身 長者開心
柯仔尋日化身聖誕老人去藍田探訪獨居長者，大派頸巾同冷帽，佢話為免掃興，大時大節都會畀職員放假，所以每逢節日落區就要出動太太幫手，而太太一直都好支持全無怨言咁話。而佢都好識做，落完區會同太太去行尖沙咀感受節日氣氛，仲會食聖誕大餐慶祝添！
佢仲話平日落區都有唔少街坊問太太喺邊，所以尋日太太現身都令到一班長者好開心，最過癮係發現長者都有唔少聖誕願望，更有人把握機會，催佢哋兩公婆快啲生小朋友。柯仔就話場面搞笑，當時就回答唔夠勤力未咁快有小朋友，而太太就淨係以笑代答喇！