中環出更：聖誕辰曲 唔啱音做賣點
聖誕節嘅街頭到處都聽到聖誕歌，節日氣氛濃厚，連立法會議員田北辰都唱埋一份。不過，佢就創新地唱《聖誕辰曲2018》，將成首聖誕歌《Jingle Bells》重新填詞，大話要「抽乾太平洋」，但就完全唔啱音囉！
扮埋聖誕樹應節
田北辰一開波就唱住歌咁自我介紹，又名田二少嘅佢仲話自己係「田家Second Son」添！而經營時裝生意嘅佢又模特兒上身，試穿西裝褸、煲呔等，實行把握機會做廣告，仲將歌詞「Jingle Bells，Jingle Bells，Jingle all the way！」改做「西裝褸，加煲呔，頸巾圍自己」，而佢之後又喺片段中扮聖誕樹應節，着上綠色衫，再將裝飾品圍住自己。
硬銷完自己後，佢都不忙宣傳地區工作，話新西嘅區議員用心跟個案，又叫大家環保啲，包禮物時要用報紙喎。不過，佢唱唱吓都質疑歌詞唔啱音，提係咪要改過，但助手就話潮流興唔啱音，叫佢照唱就得，實行出奇制勝。
卓妮