中環出更：黃子妍拯救流浪動物 減壓兼享家庭樂
城中唔少專業女性擁有自己事業，同時又要妥善照顧好家庭，所承受嘅壓力絕對唔少，的確需要妥善分配時間同做好減壓工夫。全港商會中西區會副會長黃子妍（Iris）就分享，公餘時間會去照顧流浪動物，更試過為救狗而搞到要縫針添！
早前舉行咗一個表揚商界女領袖嘅頒獎禮，Iris就係其中一名得獎者，另外仲有仁濟醫院總理孫蔡吐媚、博愛醫院總理黃曉君等合共十六位得獎者，而傑出商界女領袖協會創會理事長彭志明亦有到場支持。
Iris平日專注工作之餘亦不忘家人，好似會把握時間同父母一齊照顧流浪動物，例如餵流浪狗、捉佢哋絕育再放養等，而佢試過爬入貨櫃底捉流浪狗去絕育，搞到撞親額頭要縫針，但佢話無所謂喇！另外，佢現時所養嘅動物都係領養，當中連雀都有，因為有人棄養囉，佢就希望大眾明白動物都有生命，養動物時要有所堅持。
孫蔡吐媚就獲仔女現身見證領獎，佢話家庭支持對事業女性非常重要，而回想以前兼顧仔女學業同事業時都大呼辛苦，好似仔女放學就要趕返屋企檢查功課，到深夜再返公司繼續搏殺，不過現時四個仔女都碩士畢業，又肯返公司幫手，佢都安樂晒，話好感恩。
黃曉君話事業同家庭靠分工合作
而黃曉君就話事業、家庭同樣講求分工合作，其中照顧小朋友最重要以身作則做好榜樣喇，另外同仔女嘅溝通都唔能夠忽略，所以仔女有心事都好願意同佢分享。
卓妮