政情：田二少把關不力 踢波輸畀小學生
平時從來都唔踢波嘅立法會議員田北辰（田二少），尋日竟然着起波衫、綁好波鞋落場守龍門，究竟搞邊科？只見佢同三名退役曼聯球星組成一隊，對住一百個香港小學生，並唔係正規比賽。不過，對手雖然係小學生，但腳法一啲都唔失禮，成功兩次攻破田二少嘅十指關，結果小學生隊以二比一贏咗，真係曼聯球星都救唔到佢喇！
比賽冇乜準備過
田二少話，佢原本只係負責聯絡啲小學生，等多啲清貧學生有機會同大球星踢吓波，點知後尾要落埋場。佢直言從來都冇踢波，龍門更加唔識守，不過佢都冇為此特別訓練，只係買咗啲裝備，同埋了解過個秘訣係企前啲守喎！咁少準備，難怪輸波啦！
話時話，田二少成日鬧港鐵監管不力，今次輪到佢「把關」不力，真係失威喇！