中環出更：近半社工感專業自主受損 邵家臻認衰慚愧
尋日高教界同社福界團體公布有關專業自主調查，席間有註冊社工大數現時社工所面對嘅困境，搞到立法會社福界議員邵家臻都要認衰話慚愧，到底衰咩呢？
團體「高教公民」同「社會復興運動」年中向業界進行調查，一共收番超過五百份問卷，結果四成七嘅學術人員同埋四成三社工認為，專業自主程度相比一年前有所倒退，更有社工分享有同工怕分享遭秋後算帳，又有人被要求擺設政治議題街站影響服務。
指兩年都冇改善要再努力
邵家臻聽完後就大呼慚愧，因為兩年前參加立法會選舉時，其中一項重要目標係激活社工參與公共事務，喺社會公義中有所實踐，點知今次調查就說明，呢兩年間問題無任何改善，所以話自己要再努力囉。
佢又話，參與社會運動係社工血液嘅一部分，現時情況令佢擔心社工會失去社會性而變得失色，面對不公義都變得沉默，好似近年上街嘅社工怕畀人知道職業，有別以往以社工身份放大政治能量。邵家臻講到咁心淡，會唔會自己率先放棄呢？
卓妮