反對派喺立法會中拉布，不但浪費時間同納稅人金錢，可能仲非常唔環保。立法會一份報告指出，立法會綜合大樓喺一七至一八年度嘅「能源間接排放」溫室氣體排放量，較一六至一七年度有所微升，而原因之一，正正係會議總時數增加。
呢份溫室氣體核算報告指出，立法會綜合大樓喺一七至一八年度嘅「能源間接排放」溫室氣體排放量為約八千一百二十一公噸二氧化碳當量，較上一年度增加百分之二點一四。能源間接排放主要係使用電力時產生，報告指出，一七至一八年度立法會及委員會會議嘅總時數，分別較上一年度增加咗五十八小時及三百一十小時，升幅分別約百分之十二及二十六，成為電量增加嘅主要原因之一。其次係一七年嘅夏天較熱，增加使用空調嘅電力。
睇番一七至一八年度，正值修改《議事規則》同審議「一地兩檢」，反對派議員喺呢兩個議題瘋狂拉布，導致不斷加開會議，自然令用電量大增啦，所以拉布極可能係立法會綜合大樓用電量同溫室氣體排放量嘅罪魁禍首。