政情：梁耀忠炒人炒不停 知名度上升
立法會議員嘅民望升跌，好睇佢哋嘅表現。香港民意研究計劃於上月下旬至本月初就立法會議員的評分及認知率進行調查，以對議員嘅熟悉程度計，街坊工友服務處嘅立法會議員梁耀忠（阿忠）喺過去一年以來，首次躋身入十大。街工呢半年以來先後爆出勞工組糾紛同埋天水圍天晴團隊炒人事件，矛頭都直指阿忠。唔通阿忠呢鋪真係炒人炒出知名度？
打入認知率十大
港大民研計劃民意嘅調查結果顯示，對比過去四個月，以熟悉程度計算，阿忠同立法會議員謝偉俊（Paul）取代議員朱凱廸同立法會主席梁君彥入主十大。阿忠同阿Paul嘅認知率分別為八成六同近九成一，而支持度評分方面，阿忠同阿Paul就分別有四十六點八分同四十四點一分。而阿忠更係喺舊年十一月同類調查以來首次上榜。
一直主打勞工權益問題嘅街工，今年五一勞動節諷刺地爆出「勞工組」糾紛，擾攘多時，更引發街工退會潮，事件以「勞工組」三人同街工「分手」畫上句號。惟日前街工天晴團隊三名組織幹事被「炒魷」，真係炒人炒不停。唔知係咪咁，亦都令一向喺議會低調、連委員會主席都唔願意做嘅阿忠，知名度同曝光率都提升喇！
謝偉俊重新上榜
至於身兼立法會議事規則委員會主席嘅阿Paul繼今年三月後，認知率重新打入十大，唔知又係咪同立法會最近商討緊係咪修改《議事規則》，加入罰則處分行為不檢嘅議員有關呢？
另外，今次進入「十大」嘅議員中，有六人係女議員，分別係葉劉淑儀、梁美芬、蔣麗芸、陳淑莊、毛孟靜同李慧琼，六人嘅評分全線下跌，當中梁美芬跌幅最大，下跌五分，得三十六點六分。至於評分最高嘅議員，就係獲五十七分嘅田北辰，佢亦係自舊年十一月以來，連續四次排喺榜首。