中環出更：李周美枝學急救助人自助
近期有一隻劣評如潮嘅吉祥物新推出，不過就引起咗社會對施行急救嘅關注，而早前香港女童軍總會舉行周年晚宴，當然要趁機了解一下制服團體對呢方面嘅睇法，其中香港總監李周美枝就認為要學定急救，以備不時之需喇！
香港女童軍總會早前舉行周年晚宴，女童軍可謂傾巢而出，好似晚宴籌委會主席陳明耀、副會長陳曦齡同戴胡美蓉等非常熱鬧，而今年晚宴更大搞新意思設立Catwalk環節，罕有地見到常以制服示人嘅女童軍改穿旗袍同華服。
話救人唔應該諗太多
曾經學過急救嘅李周美枝直指急救並唔難學，學完不單止可以自我增值，萬一屋企有意外發生，急起上嚟都可以用得着，但佢就未曾用過相關知識去救人喇！對於社會擔心施行急救有法律風險，佢就話救人唔應該諗太多，遇到危急關頭都要幫咗先。
本身係兒科醫生嘅陳曦齡就認為，現時的確出現漏洞令施行急救者有機會招惹官司，但佢認為香港人有質素而唔需要太擔心，而且出現危急情況時都值得去施行急救，加上現時人口老化，學習急救嘅需要比以往增加。另外，佢幾個月前因追的士而拗柴，當日見佢仍要包紮左腳，難怪佢大嘆能醫不自醫，不過佢話生活影響唔大，更好嘅係唔會周街行而減少咗消費添！
至於陳明耀就以上海灘造型示人，直言周年活動應該要輕鬆吓。佢就話未學過心外壓等急救知識，但基本嘅包紮同處理傷口知識都有所掌握，好似有朋友食飯時刨到手指流血，都係靠佢出手處理咋！
卓妮