內地話「端起碗來吃肉，放下筷子罵娘」，即係廣東俗語嘅「食碗面反碗底」，香港電台呢頭食皇糧食到肥肥白白，嗰頭甘當反中亂港勢力嘅傳聲筒，呢啲咪就係窩裏反嘅人辦囉！
說話港台新大樓由最初預算耗資六十億大元，遭民意強烈反對，縮水至五十三億元，但仍然被立法會否決。有議員尋日追問政府，計劃係咪因土地問題而「壽終正寢」，商務及經濟發展局局長邱騰華顧左右而言他，淨係話計劃優先次序唔高，加上立法會批評預算過高，當局正尋求其他方案，總而言之就係滿口官腔，講完等於冇講。
所以話特衰政府對港台呵護備至，就係咁解。港台嘥米飯早就有口皆悲，審計報告N年前已經狠批港台帳目不清、管理混亂等多宗罪。實情係，港台每年開支大拿拿十億銀，但好多頻道收視收聽率竟然係零，就連林鄭都頂佢哋唔順，公開批評港台電視頻道節目內容空洞，一日到黑loop硬照，喺咁嘅情況下，莫講話起新大樓，連現有總部都一早應該收番，橫掂特衰政府呻「地從何來」呻到樹葉落，廣播道分屬罕有市區靚地，交通配套設施一應俱全，收番嚟起公屋，又或者賣畀私人發展商益吓庫房，都係唔錯嘅選擇。再講吖，同樣廢柴嘅香港郵政都要交番中環總局笪地，港台憑咩廢人霸靚地吖！
講真，嘥米飯仲係其次，養狼狗、咬心口嗰度至惡頂。港台食阿公着阿公，理應幫手宣傳政令，保駕護航，點知事實啱啱相反，一個《頭條新聞》，一個《城市論壇》，前者陰陽怪氣專抽政府水；後者立場直頭側埋一邊，專門畀位反對派政客上，試過有次「辯論」題目居然係「一國兩制呃足廿年」，唔知嘅仲以為睇緊「爛果報」，咁就難怪港台被質疑唔單止係反對派嘅「私家台」，更加係港獨分子嘅「傳聲筒」。早排外國記者會邀請陳浩天播獨，港台一度想全程直播，後來內部有人緊急煞停至作罷，問你服未？
講開外國記者會嗰壇嘢，港府鬧到牙血都出，又話「超越底線」，又話「不能容忍」，結果除咗拒續簽證畀個老外副主席，完全冇符。嗱，外國記者一個二個紅鬚綠眼，港府就話嚇到瀨尿啫，港台係你條𡃁，冇嘢好驚嘞啩。仲有吖，陳浩天嘅One man band港獨「政黨」，港府尚且出手取締，港台更有組織更有規模，港府有乜理由唔清理門戶？
講一千句漂亮話，不如做一件實事。港府口口聲聲遏制港獨「絕不手軟」，敢唔敢對港台執行家法，正正就係最好嘅試金石。