通常出席公開場合，大家都會悉心打扮一番。香港眾志常委羅冠聰（右二）過往出席活動，都會以恤衫皮鞋示人，但日前佢出席支持同志平權活動時，就罕有地以露趾涼鞋現身。佢解釋話因為右腳受傷，搞到隻腳腫咗，有需要紮住，所以冇辦法先要着露趾鞋示人。至於點解會整親，佢就透露係因為踢波整親，右腳腳踝位仲瘀晒。而佢之後都有去睇醫生做檢查，好彩唔影響行路同埋冇乜大礙。不過熱愛踢波嘅佢，睇嚟暫時要乖乖地休養，冇得踢波喇！
