政情：就快65歲 羅致光：唔好叫我阿伯
幾多歲先係阿伯呢？有啲人話教小朋友永遠叫人做「哥哥」，咁就一定冇錯，估唔到勞工及福利局局長羅致光都介意人哋點叫佢！佢尋日出席青協嘅節目時講起延遲退休，話仲有一個多星期就六十五歲，覺得六十五歲仲好後生，「千祈唔好叫我阿伯呀，甚至叫我阿叔我都有少少唔高興o架啦」，認為年輕長者活力十足，應該諗點樣鼓勵佢哋做嘢。
羅致光講起微企冇乜退休年齡時話，有次去燒臘店，斬叉燒嘅員工話想退休，老闆即刻飛身出嚟話「邊個畀你退休呀，你走咗我搵邊個拎把刀嚟斬叉燒呀？啲後生仔拎把刀都拎唔起呀！」，認為延遲退休本身係自然發生嘅事，又話年輕人讀完肉類分割技術員課程後，好多人因勞損而放棄，笑指「年輕人要多啲運動呀吓」。
話打風停工 僱員冇議價能力
山竹襲港後，好多人認為香港應就停工修例，羅致光就話好難去界定災後邊啲人要返工，邊啲人唔使返工，例如保安停工打風後就「打劫成災」，但保鏢就未必要返工，今次風災令好多醫院、安老院嘅員工連續工作三十多小時都冇人接更，佢同意僱員冇議價能力，政府會協助制訂相關指引。