政情：展館大 行到攰 許章榮倡電動輪椅代步
中華廠商聯合會常務會董許章榮雖然健步如飛，但佢近嚟好留意市面上嘅電動輪椅。原因係經常出席展銷會嘅佢，有感展銷場館嘅樓面面積愈嚟愈大，單靠雙腿實在疲累不堪，若果有一部電動輪椅畀佢代步嘅話就理想喇！
許章榮話作為展銷場地，香港嘅機場博覽館面積已經唔細，然而比機場博覽館仲要大得多嘅展覽場館，無論歐洲同內地都有好多，有氣有力嘅年輕人喺裏面行完一個圈隨時腳軟，上咗年紀嘅人就更覺辛苦。佢認為用電動輪椅代步係一個解決方法，不過佢睇過好多款電動輪椅，都嫌速度同售價過高。
日租300元 不失為財路
到底揀邊款？佢話如果搵內地廠家生產，將最高車速限制至同步行相仿，使用上既安全，成本亦應可下降好多，若果大量購置並以三百元嘅日租租出，應該會好受歡迎，以生意角度而言實在係一條財路，展館方面不妨考慮一下。