政情：港台死唔搬走霸靚地阻起樓
香港電台（港台）電視大廈同廣播大廈坐落黃金地段嘅廣播道，與唔少豪宅為鄰，實在有土地資源錯配之嫌。港台新大樓計劃一直只聞樓梯響，商務及經濟發展局局長邱騰華直至尋日仲話項目仍然喺工務工程之中但次序唔高，換言之，港台繼續霸靚地，唔拎番啲地出嚟增加房屋供應，簡直係浪費，難為住緊劏房嘅基層市民，唔知幾時先至上到公屋？
港台新廣播大樓爭議多多，拖拖拉拉至今已四年多，但仍然停留喺計劃階段，毫無進展，所以尋日立法會一個事務委員會上，就有泛民議員質疑計劃已經壽終正寢。其實，當年政府計劃耗資六十億元興建「超豪」港台新大樓，但造價被炮轟過高先拖到至今落實無期，不過政府早前先公布天價「明日大嶼」計劃，涉款最少五千億元公帑，相比之下港台新大樓造價少得多，又難怪有泛民議員將兩個項目相提並論，借機諷刺政府大嘥囉！
立法會工務小組曾否決港台新大樓項目，之後政府試過為造價減磅至五十三億元搬入去將軍澳，但因政府唔夠票而撤回撥款申請，將計劃推倒重來。其實港台現有嘅設施運作多年嚟都夠應付運作，到底有冇需要一個規模咁大嘅新大樓呢？答案不言而喻喇！
研多部門共用新大樓觸礁
去到上年初，廣播處處長梁家榮話研究將新大樓同其他政府部門共用以做到地盡其用，但事隔半年就宣布觸礁，中止同政府化驗所興建聯用大樓。而邱騰華尋日就話會繼續朝共用大樓方向探討，搵合適情況同地點去執行，但被問到具體時間表時就無再補充，睇怕等完三年之後又三年，都仲未搬得走港台。
雖然港台新大樓興建遙遙無期，亦唔應該畀港台繼續霸住廣播道靚地，尤其香港房屋供應緊張，既然港台係公帑營運嘅，政府更應以身作則，攞番啲地出嚟興建公營房屋，紓解基層市民嘅住屋需要，而港台搬去一個面積合理，造價亦相宜嘅地方就得喇，然而搬遷計劃拖完又拖，簡直係浪費土地呀！