中環出更：林鄭錯誤示範 帶鄭若驊外訪唔怕出醜？
律政司司長鄭若驊上任超過九個月，民望評分持續低迷，外界分析原因與律政司檢控不時「甩轆」，仍有大批違法佔中搞手未告等有關，就喺鄭若驊自身工作都未做好之際，下周訪問日本嘅特首林鄭月娥就作出錯誤示範，竟然帶同鄭若驊參與日本部分行程，莫非唔怕鄭若驊畀人問到口啞啞，丟人現眼？
工作表現拙劣 不如留港辦公
林鄭下周一起一連五日訪問日本，據報鄭若驊、商務及經濟發展局局長邱騰華同創新及科技局局長楊偉雄將會參與部分行程。林鄭今次率領一司兩局長訪日，最令人摸不着頭腦嘅係，鄭若驊竟然有份隨行。
眾所周知，鄭若驊今年初上任至今，遭各界狠批工作表現拙劣，拖拖拉拉最長時間嘅工作，就係一四年違法佔中案，壹傳媒黎智英等大批違法佔中搞手逍遙法外；而於舊年六月，黎智英涉刑恐《東方日報》男記者，事隔逾一年仍未作出檢控；另外鄭若驊更被揭出席率差強人意，今年上任首半年喺立法會司法及法律事務委員會嘅出席率僅兩成半。
由此觀之，鄭若驊與其有時間外訪，倒不如留港處理好公務，林鄭冇擦亮眼睛，錯誤示範容許鄭若驊外訪，唔通就唔怕鄭若驊又有「甩轆」事情發生，到時就真係百詞莫辯。
卓妮