中環出更：錢大康幾忙都運動出汗兼收腩
體育運動以前往往被家長視為「遊戲」之一，喺「勤有功，戲無益」嘅觀念下，唔少小朋友都因學業而被迫放棄運動。浸會大學尋日就舉行精英運動員入學計劃頒獎禮，浸大校長錢大康話幾忙都好，仍然會每星期抽一日去踩單車，而且唔係健身嘅單車機，而係踩出馬路嗰隻，佢話每次都會踩大約兩個鐘，加埋四十公里左右，保持出汗之餘，亦可以收吓肚腩，難怪尋日佢就以好快嘅速度離開，趕去下一個活動，睇嚟踩單車仲可以練埋腳骨力噃！
正所謂行行出狀元，近年體育喺香港漸漸受到重視，香港浸會大學運動及體育學系系主任周碧珠話受惠於近年港府大力推動康體發展，康文署一個管理體育設施場地嘅職位，月薪可以去到兩萬七千蚊；而由於體育系學生嘅體能往往比較優秀，唔少人轉考紀律部隊，例如消防處咁成功率都高啲，雖然起薪點遠遠不及醫科等專業科目，但都比一般商科科目高出一截囉！
林大輝每個星期去踢波
以往傳出唔少內地運動員年少時只顧練習而犧牲學業，結果運動員生涯完結後就變得好潦倒。香港體育學院主席林大輝話內地都開始重視運動員嘅學業，而香港近年亦大力推動本地精英運動員去讀書，「有書畀小朋友讀，啲家長先唔會反對佢哋練習嘛」，佢又承認喺運動員生涯完結後，學業對運動員轉型非常重要，因為唔少運動員退休後會轉做教練，就算跳出體育界，亦可以擔任中學嘅體育老師，「咁你就算做個售貨員賣體育用品，都要識表達，都要識睇英文說明」。
講起運動，林大輝就話每星期仲有踢波，仲負責跑動最多嘅中場添，佢又話足球係世界上最多人關注嘅運動，所以香港嘅體育發展，最受關注嘅始終係足球，其次係單車，因為拎得獎比較多喎。
卓妮