正所謂，一分耕耘，一分收穫。港府開口埋口發展創新科技，由董伯伯提出嘅「乜港物港」，到曾蔭權爵士所謂嘅「優勢產業」，再到前朝吹噓嘅「做大做闊」、「智慧城市」，大大話話吹足廿一年，仲連創科局都成立埋嘞，理應做出成績，但事實到底係點呢？
睇吓今年嘅世界經濟論壇全球競爭力報告咪搵到答案囉。香港今年排名第七，比去年跌一級，莫講話同排第一嘅科技大國美國冇得揮，愈戰愈勇嘅新加坡亦穩佔第二，早就將香港拋離九條街。雖然主辦機構話評分標準有變，唔可以同舊年排名直接比較，但明眼人都知呢啲只係客套話咋，逆水行舟、不進則退先至係香港寫照。
冇錯，香港喺宏觀經濟穩定及健康指標表現最好，攞到一百分滿分，基礎建設亦有唔錯嘅評分，弊在發展創新能力弱過弱雞，加埋市場規模及勞工市場等局限，拉低整體分數，再唔諗計改善，出年跌多兩級都唔止。好明顯喇，香港全靠食基建、金融老本，一旦坐吃山空，仲憑乜同人競爭，大家心照。
講起就谷氣，兩年前同一份報告已點出香港創新能力不足呢個老毛病，點知兩年後仍然冇寸進，加埋國內外競爭力調查都係得出同一結論，到底港府幾時先至知恥近乎勇o架？事實勝於雄辯，咪睇港府將創新吹到震天價響，其實葉公好龍，當局喺科研方面嘅投入僅佔本地生產總值百分之○點七，莫講話遠低於國際平均水平，同投入佔經濟產值百分之四嘅深圳更加不可同日而語。你話喇，種棵樹都要淋水施肥至會成長，發展創新科技口惠而實不至，咪即係嘥氣。
鬼咩，歷屆政府唔止淨係識得空喊口號，一班廢官仲一味坐井觀天，好似曾蔭權爵士揚言「單靠金融業就可以養活一千萬人口」，佢老死鬍鬚曾仲話香港嘅成就並不膚淺，無懼競爭，對外邊發生翻天覆地嘅變化不聞不問，香港點會有運行吖。呢嗱，咪以為林鄭上場會有改觀呀，阿姐佢連八達通都唔識用，邊度買廁紙又唔知，旨意佢推行電子支付、金融創新網絡等創新經濟喎，不如叫佢疊埋心水做奶媽好過。
三十年河東，三十年河西。一河之隔嘅深圳唔使三十年就脫胎換骨，成為「中國硅谷」，擁有大批知名創科公司，皆因當地政府有承擔有遠見。相比之下香港仍然係地產同金融兩味，搵間見得人嘅高科技公司睇吓都冇，簡直羞家。冇計喇，港產官僚無知又無能，就算內地出到聲話香港創科「不溫不火」，出埋錢要求港府急起直追，都注定係對牛彈琴嘅咋。