日本作家太宰治有名言：「生而為人，我很抱歉。」有人指出，呢兩句係話我哋一定有很多抱歉想要述說，呢種「虧欠感」就係對生命嘅內省。老朽由此聯想起香港嘅打工仔，「生而為打工仔，我很痛苦」，佢哋嘅「虧欠感」，來自對準時返工嘅無奈，點解一年總有十次八次，港鐵會出現嚴重事故延誤？平時半個鐘嘅車程搞到要幾個鐘頭，令打工仔身心俱疲。
近年港鐵發生嚴重延誤事故好似食生菜咁，去年有成十宗，今年都唔慌會少。剛過去的「九一七準時返工全城逼爆」，交通大癱瘓，「塞爆列車」悲情上演。誰知塞爆事故滿月，天災剛過，人禍又來，十月十六日港鐵「四線齊冧」，荃灣、觀塘、港島及將軍澳線先後發生信號故障，要靠人手操作，列車只能「龜速」前行，各車站大堂及月台擠滿上班、上學的人群，大批「災民」難耐鐵路服務癱瘓，衝到路面「逃生」，導致巴士、小巴及的士站均湧現人潮，據悉繁忙時間全九龍塞車路段長達四十三公里，車龍長過馬拉松，港鐵又製造奇景！
信號系統係現代交通嘅靈魂，港鐵去年起動用了三十多億元，陸續更換市區多條港鐵線嘅信號系統，又話去年十一月荃灣線已更換百分之七十，之後安裝工程亦已完成，正進行覆蓋整條荃灣線嘅測試，如今出現延誤，又話與測試無關。希望港鐵未查清延誤真相前切勿再靠估，一旦新舊系統切換問題無法解決，類似的「四線齊冧」再次上演，打工仔的憤怒若被推到臨界點，恐怕不是「生而為打工仔，我很痛苦」咁簡單！
禍福無門，唯人自招。特衰政府管治無能，亂象此起彼落，香港這個「福地」也被搞到人心惶惶。打工仔不過是想準時返工，也要如攀登險峰般艱難，你話香港好運未過都冇人信喇！