政情:做過懲教係嚴啲 單日堅教游水激嬲老婆

懲教署前署長單日堅卸任署長後退而不休,擔任香港遊樂場協會副主席嘅佢經常出席唔同活動。佢尋日出席一個高疊箱攀爬比賽時就自爆,以前唔止「足、籃、排、乒」,即足球、籃球、排球同乒乓球都啱玩,仲經常去游水添!不過佢就自爆以前試過教老婆游水,仲話:「教到老婆唔識我!」其實係因為佢教老婆游水嘅時候太惡喇,所以老婆就嬲咗佢,好彩最後都氹得番個老婆咋!睇嚟做過懲教署,真係連教游水都嚴肅啲噃。

想試吓玩高疊箱攀爬

被問到會唔會試吓參加高疊箱攀爬比賽,佢就話呢個活動喺歐美盛行,協會覺得可以提升年輕人自信心,所以喺舊年引入香港,搞咗個公開賽,今年係第二次搞。佢又話見到啲年輕人玩,自己都有啲心郁郁想試,覺得自己做過紀律部隊,體能上信心係有嘅,只係未必有年輕人咁fit啫!同單同場嘅仲有支持今次活動嘅基金會創始人蔡志堅,蔡就認為高疊箱攀爬比賽都好啱企業組隊參加,因為比賽講求攀爬員,拋箱者同扶箱者嘅合作,有助加強企業員工嘅團隊精神咁話。

第一手消息請下載on.cc東網iPhone/iPad/Android/Windows Phone Apps