政情：黃之鋒又唱衰香港 促英美介入馬凱事件
香港外國記者會（FCC）早前邀請香港民族黨召集人陳浩天出席午餐會演講，當日負責主持嘅FCC第一副主席、英國《金融時報》亞洲新聞編輯馬凱（Victor Mallet）早前不獲港府續發工作簽證。香港眾志秘書長黃之鋒又唱衰香港，喺《時代》雜誌上撰文形容係「大事件」（Big Deal），批評事件令香港言論自由受損，仲呼籲英美政府施壓介入，同埋希望美國國會可以盡快落實《香港人權民主法》。
指損害言論及新聞自由
黃之鋒聯同眾志常委敖卓軒發表文章，提到馬凱係自香港回歸以來，首名被驅逐嘅外國記者，又指內地政府慣常以撤銷工作簽證，來懲罰會報道敏感議題嘅記者。
佢哋喺文中又引述英國外相侯俊偉上星期所發嘅聲明，指事件損害咗香港受《中英聯合聲明》同埋《基本法》保障嘅言論同新聞自由。佢哋又話包括馬凱事件在內，近日多宗事件破壞香港自治，應引起全球社會關注，並有責任採取行動。