政情:山竹人禍 議員五箭齊發追殺張建宗

超強颱風「山竹」掠港滿月,本港多區仍有大批塌樹枯枝,港府堅拒總動員清理捱轟。立法會繼本月初內務委員會舉行特別會議狙擊政府風災善後不力,被視為新立法年度第一擊嘅下周三(24日)立法會大會,多達五名議員提出口頭或書面質詢追殺政府跟進山竹善後工作嘅最新進展,巧合地清一色都係建制派議員,當中有三名議員更可於大會口頭質詢,睇怕上次帶領一眾高官到立法會解畫嘅政務司司長張建宗,走唔甩要接招兼撲火嘞!

五人均提同類質詢 近年罕見

立法會下周三大會,將會係新立法年度首次有六條口頭質詢及十六條書面質詢,另外議員亦可提出無約束力議案,據內務委員會最近文件顯示,最少有五名議員問及山竹襲港嘅問題,包括民建聯葛珮帆及張國鈞、工聯會何啟明及郭偉強等,雖然五人嘅質詢內容側重點各有不同,但同樣瞄準山竹善後工作,有關情況實屬近年罕見。

當日可以第一個作出口頭質詢嘅何啟明,關注有份參與山竹善後工作嘅外判清潔工津貼福利情況,以及僱員於打風期間上班嘅權益會否受損;同樣提出口頭質詢嘅郭偉強,則關注山竹同去年颱風天鴿襲港期間,本港邊啲公私營屋苑同鄉村曾出現嚴重水浸,未來當局又會否加設防洪、水浸設施等。

仲記得山竹襲港滿城塌樹,張國鈞喺書面質詢要求政府交代,有邊啲部門係專責清理緊急塌樹事故,當中邊啲部門係外判畀私人樹藝公司負責;葛珮帆則特別關注西貢區路邊種植好多唔適合嘅樹,隨時危及行人安全,追問政府會否移除危樹,以及在將軍澳海濱長廊加固堤壩、增加防波堤等。

今次議員五箭齊發,勢要將政府山竹善後「唔踢唔郁」嘅真實情況,一五一十呈現各方眼前,張建宗上次都要「一拖九」,即聯同九名問責高官到立法會去解畫,今次睇怕都走唔甩要繼續居中協調,就算張建宗決定唔現身立法會解畫,交畀多名問責局長去解說,張喺背後做好統籌協調工夫,實屬應有之義,否則到時現身解畫嘅高官被議員狠批至體無完膚,身為港府第二把交椅嘅佢都無法置身事外,兼要有執手尾嘅心理準備。

第一手消息請下載on.cc東網iPhone/iPad/Android/Windows Phone Apps