政情：山竹人禍 議員五箭齊發追殺張建宗

五人均提同類質詢 近年罕見

立法會下周三大會，將會係新立法年度首次有六條口頭質詢及十六條書面質詢，另外議員亦可提出無約束力議案，據內務委員會最近文件顯示，最少有五名議員問及山竹襲港嘅問題，包括民建聯葛珮帆及張國鈞、工聯會何啟明及郭偉強等，雖然五人嘅質詢內容側重點各有不同，但同樣瞄準山竹善後工作，有關情況實屬近年罕見。

當日可以第一個作出口頭質詢嘅何啟明，關注有份參與山竹善後工作嘅外判清潔工津貼福利情況，以及僱員於打風期間上班嘅權益會否受損；同樣提出口頭質詢嘅郭偉強，則關注山竹同去年颱風天鴿襲港期間，本港邊啲公私營屋苑同鄉村曾出現嚴重水浸，未來當局又會否加設防洪、水浸設施等。

仲記得山竹襲港滿城塌樹，張國鈞喺書面質詢要求政府交代，有邊啲部門係專責清理緊急塌樹事故，當中邊啲部門係外判畀私人樹藝公司負責；葛珮帆則特別關注西貢區路邊種植好多唔適合嘅樹，隨時危及行人安全，追問政府會否移除危樹，以及在將軍澳海濱長廊加固堤壩、增加防波堤等。

今次議員五箭齊發，勢要將政府山竹善後「唔踢唔郁」嘅真實情況，一五一十呈現各方眼前，張建宗上次都要「一拖九」，即聯同九名問責高官到立法會去解畫，今次睇怕都走唔甩要繼續居中協調，就算張建宗決定唔現身立法會解畫，交畀多名問責局長去解說，張喺背後做好統籌協調工夫，實屬應有之義，否則到時現身解畫嘅高官被議員狠批至體無完膚，身為港府第二把交椅嘅佢都無法置身事外，兼要有執手尾嘅心理準備。