中環出更：鄭松泰擺烏龍 爭取女性「侍產假」
政府建議將法定產假增至十四周，所有女性公務員仲即時享有延長嘅假期添，但係爸爸侍產假呢？立法會議員鄭松泰好有「先見之明」，早幾日就去信立法會行政管理委員會，話要即時延長立法會秘書處女性職員可享有的「侍產假」喎！勞工及福利局副局長徐英偉聽到後仲笑言要認錯，話係局方推廣不足，令鄭分唔清，會搵時間同鄭「溝通」吓。
根據封信內容，題目寫「侍產假」，但內容都係寫番想為秘書處女性職員爭取十四周「產假」。鄭回覆時就笑笑口話，其實係手民之誤，當日有支持者分享相關貼文時，更笑問係咪想爭取同性婚姻合法化？不過，作為爸爸嘅佢都覺得侍產假應該延長，如果十四天就好，可以對住BB耐啲，而佢畀秘書處嘅信件已經改番正確。
徐英偉笑言局方宣傳不足
徐英偉得知事件之後仲好疑惑，喺其身旁嘅勞福局局長羅致光仲笑笑口話「唔會嘅，寫錯啫」。到睇完封信之後，徐就笑住話都係勞福局做得唔好，宣傳唔夠，令到大家分唔清乜嘢係侍產假同產假，之後會捉埋政治助理馮興禮去搵鄭松泰，做多啲宣傳教育工作喎。
卓妮