中環出更：黑面神易升職？黃進達：笑多啲有着數
最近外國有研究發現，返工時黑面嘅人犯錯機率較低，所以晉升機會愈高。早前喺一個活動上見到家族有旅行社同酒樓生意嘅香港旅遊業議會主席黃進達（Jason），佢話呢項調查可能要視乎係乜嘢職業而定，但係香港以服務業為主，已經成日被批評欠奉笑容，所以打工仔都係笑多啲好，自己同客戶都會開心啲喇！
Jason話香港人成日鍾意去泰國、日本玩，就係覺得當地人笑容多、服務好，始終有笑容會令人覺得和善，同工作認唔認真冇直接關係。
馬清楠自言工作嚴肅嚇怕同事
開律師行嘅保良局副主席馬清楠（CN）都話工作專注唔代表要黑口黑面，好似佢自己平時鍾意搞笑，但工作時神情好嚴肅，同事就會覺得好驚。佢工作時見到新入行嘅律師，如果對方笑容好好，佢反而會畀多啲工作佢做，仲話笑容會令人望落後生幾歲添！既然兩位老闆都咁講，打工仔千祈唔好亂咁學，諗住黑口黑面返工博升職嘞！
呢日係香港潮州商會青年委員會午餐聚會，Jason剛剛接任主席，佢大讚前主席章曼琪任內將會務搞得有聲有色。當日仲有三名啱啱加入商會嘅年輕人列席，包括香港鐘表業總會前主席陳正欣嘅大女陳筠霖、做賽車運動生意嘅李仲康同做投資嘅黃清敏，令青委增加唔少活力。
喜歡鑽研家鄉文化嘅參事胡炎松獲邀上台分享中國人「食」的文化。佢話以前啲人一見面就問對方食飽未，後來演變成一種問候語，其實係反映當年生活困難，大家都求溫飽，於是「食」變成人與人之間好重要嘅聯繫。不過依家大家衣食無憂，食已經唔係咁重要，係時候提升一下文化層次就真。
卓妮