反中亂港有奶水 愛國愛港飲鏹水

話說富豪汽車近日喺「爛果報」刊登全版廣告，擺明向淫媒送錢。富豪本來係歐洲品牌，但年前已被內地吉利汽車集團收購，成為紅色資本。紅色資本唔係幫自己人賣廣告，而係居然公開「資敵」，為反中亂港嘅淫媒送錢送子彈，等佢哋可以繼續日日高喊「天滅中共」，日日為港獨提供輿論平台，你話係咪精神分裂吖。

係人都知，壹淫媒連年虧損，債台高築，旗下刊物摺埋嘅摺埋，縮水嘅縮水，加上狂人特朗普上台之後「美國優先」，狗餅不斷減量，漢奸黎窮途末路，眼看半隻腳已經入土為安，好多人買定紙船明燭，準備送佢上路，點知紅色資本對淫媒拔刀相助，直頭仗義過及時雨宋公明，正因為咁，淫媒近排動作多多，頗有鹹魚翻生之勢。

西諺有云，a friend in need is a friend indeed，每次漢奸黎山窮水盡疑無路，總係「紅色奶水又一村」，當初淫媒得以上市，正正係得到中資銀行借出巨款，至於紅色根據地井岡山喺爛果報大賣廣告，珠海出版社為漢奸黎豎碑立傳，深圳等地大量走私爛果報，更加不在話下，結果就係漢奸黎喺「紅色奶水」餵養下，愈來愈賤肉橫生，愈來愈有恃無恐。

講真，漢奸黎以反中亂港、宣淫販賤為職志，策動佔中、黑金禍港瓣瓣齊，港英餘孽包庇佢唔難理解，但北大人點解都對佢關愛有加？唔通阿爺有鋪「被虐」癮，真係好似歌仔咁唱「只因這種狠，深得我心」？定係怕咗佢背後嘅外部勢力，想話「花錢買平安」吖？

最令人百思不得其解嘅係，紅色阿娘這邊廂「奶漢奸」，那邊廂「虐親兒」，內地兒童食三聚氰胺毒奶粉、接種假疫苗呢筆唔講，淨係講愛國愛港正義傳媒，廣告就冇嘞，被人告到一仆一碌就有份。大家有眼見，包括消防處、食環署、衞生署、控煙辦、淫審處等等政府部門輪番踩上門，大搞「假調查，真滋擾」，製造白色恐怖，打壓言論自由；更加唔使講漢奸黎涉刑恐記者，律政司拖得就拖，賴得就賴，死都唔肯將漢奸黎落鑊。

一句講晒，反中亂港有奶水，愛國愛港飲鏹水，阿爺也好，港府也罷，做盡親痛仇快之事，香港回歸人心卻遲遲未回歸，大家知點解喇！