政情:社福服務全天運作 施家殷嘆難風後停工

風暴「山竹」早前襲港,風後全城滿目瘡痍,交通混亂,引起社會激烈討論係咪應該要風後全城停工。扶康會副主席施家殷就認為,唔少社福服務需要廿四小時運作,如果風後仍要停工並唔可行。

施家殷話,社福界有唔少院舍、家舍,當中大多數缺乏自理能力,例如長者及智力較低人士等,需要有人廿四小時留守照顧。打風時已經有唔少照顧者要連踩兩更,所以如果風後仍要停工就更加困難。

提高建築標準仍須討論

本身為建築師嘅施家殷亦都留意到打風時爆玻璃嘅情況,普遍由玻璃中間爆,意味玻璃抵受唔住強勁嘅風力。至於係咪有需要提高建築標準,佢就認為要由社會討論,因為現時建築成本已經上漲,再提升標準代表用料要更加靚,價錢自然就會較高昂啦。

第一手消息請下載on.cc東網iPhone/iPad/Android/Windows Phone Apps