政情：葉永成快閃手機店只買叉電線
科技一日千里，智能電話已經係日常生活一部分。早前見到中西區區議會主席葉永成，出現喺中環一間智能手機品牌旗艦店，佢好認真咁一時睇吓智能手錶，一時就望吓手機，以為佢想趁品牌推出新機追上潮流啦，點知結果只係買咗一條叉電線，話要放喺架車度以備不時之需喎！
葉永成話，依家嘅智能電話有好多用途，既可以影相，又可以上網，不過耗電好似倒水咁快，所以喺屋企同辦公室都會擺定條叉電線，今次買多條放喺架車度備用咁話。
話冇興趣追新款
近日新一代智能手機出爐，葉永成就話冇興趣追新款。不過見佢當日戴住智能手錶，仲拎住一部平板電腦或小型手提電腦，可見佢都係趕上科技潮流之人，唔知會唔會下次見到佢，就有「新歡」呢？