政情：黃國警告 工資沙士價 恐釀激進衝突

保障人數再跌 最低工資名存實亡

目前最低工資時薪為三十四元五角，最低工資委員會最遲喺今個月底，會就法定最低工資水平向特首及行政會議提交建議報告。早前有唔少團體公開叫價，包括工聯會要求加至四十二元五角、職工盟則要求增至四十四元，而商界就建議凍結或按通脹加至三十六元。不過，最新傳出勞資雙方初步共識係調高三元，至三十七元五角，呢個數明顯同勞工界叫價差之千里喇。

黃國喺工聯會新一期月刊專訪中提及，依家香港失業率低，睇落似乎人人有工開，經濟又穩定增長，但係現實情況唔係睇落咁好，打工仔生活並無改善，基層員工甚至變得更差。佢解釋，九七年金融風暴及○三年爆發沙士，當時唔少人被減薪或裁員。今時今日，打工仔嘅人工仲係「沙士價」，好多人日做八個鐘，都不足以餬口，所以如果最低工資保障人數唔夠大，整個機制就會名存實亡。

黃國又話，雖然近期社會氣氛有所緩和，香港仍存在深層次矛盾同不穩定因素，假如民生問題得以真正解決，政治問題都會迎刃而解，反之就係醞釀另一次社會激進衝突喇！所以港府可唔可以把握呢段黃金時間，解決現存嘅民生問題，就會成為爆唔爆煲嘅關鍵因素，政府應該要喺施政報告中回應呢啲訴求。

打工仔真係好簡單，「出咗半斤力，想話攞番足八両」，有個瓦遮頭，安居樂業人人開心。可惜依家香港乜都貴，食貴、住貴、搭車貴，唯獨人工唔夠貴。如果勞工及福利局局長羅致光今次未能拆彈回應勞工界需求，民怨繼續升溫，到時就唔知點收科嘞。