中環出更：考察埃塞黃偉鴻瘦身唔成反增磅
中華廠商聯合會（廠商會）早前組團去非洲國家埃塞俄比亞考察，由身兼埃塞俄比亞駐港澳名譽領事嘅會長吳宏斌（斌哥）帶隊，團員包括前會長尹德勝、常董陳淑玲、會董黃偉鴻（Ellis）及行政總裁楊立門夫婦等十幾人。經常食飯應酬而搞到身形脹卜卜嘅Ellis，臨出發前話要展開「瘦身之旅」，可能以為當地曾鬧饑荒，冇啖好食，可以趁機減吓肥啦，點知此行好食好住，佢笑稱破壞晒瘦身大計。
Ellis話，原本今趟諗住減吓一、兩磅都好吖，點知結果肥咗一、兩磅就真。佢哋跟住斌哥享受領事級待遇，梗係唔使捱，一去到就有牛肉食，其中一款用帶酸味嘅包捲住牛肉一齊食，都幾好味。
吳宏斌狂掃百包咖啡做手信
事關當地啲牛羊雞通山跑，完全係有機飼養，所以肉質比較有咬勁。Ellis感嘆話，雖然當地經濟唔係咁好，但覺得人哋嘅快樂指數都高啲。
今次係斌哥闊別十五年之後舊地重遊，佢話覺得當地整體發展進步咗好多。佢特別安排團友參觀香港人開嘅鞋廠，仲有一對一嘅商業配對交流，希望幫吓業界搵商機。一場嚟到，團友梗係要買啲特產做手信，當地咖啡世界聞名，斌哥一口氣買咗一百包送畀廠商會會董們，真係有心。
香港金銀首飾工商總會副會長潘桂桃都係團友之一，佢話自己鍾意玩，所以去開眼界。見到當地人生活艱苦，尤其係婦女都要做擔擔抬抬嘅農村粗活，更加覺得香港人真係好幸福。
卓妮